விரிசல்

மழைகொட்டுமோர்
நள்ளிரவில் இடிவிழுந்து
விரிசல் கண்டது  சுவர்..

மறுதினம் ஆளுகொருபுறம் நின்று
நூல்கோர்த்து பார்த்தோம்...

பிரிதொர்தினம் விரிசலிடை
விரல் கோர்த்துக்கொண்டோம்...
மற்றுமோர் சமயத்தில்
கைகுலுக்கிக்கொள்ள முடிந்தது...

சிலநாட்களாய்
உள்வரவும் வெளியேறவும்
ஏதுவையிருகிறது...

ஆனாலுமென்ன
பேரிடியின் முந்தயகணத்தின்
மின்னொளியில் பார்த்த
முழுச்சுவரை என்னசெய்தும்
ஞாபகத்திலிருந்து அகற்ற முடிவதேயில்லை...

பிளாட்பாரம்

பிளாட்பார குளிரில் படுத்து
நடுங்கி கொண்டிருந்தவளை
பிளாட்பாரத்தில் படுத்து கொள்பவன்
கடக்கையில்
பரஸ்பர புன்னகைகள்
பரிமாறிக்கொள்ளப்பட்டது...
"எங்க போற?"
என்ற இவளின் தமிழ் கேள்விக்கு
அவன் ஹிந்தியில் பேசியது
பதிலாயும் இருந்திருக்கலாம்...
மொழிகளை கடந்த பரிமாற்றம்
அங்கு துவங்கிய வேளையில்
பசிக்கிறது என்றவளின்
குரலில் இருந்த பசியை அறிந்தவன்
தன் அழுக்கு மூட்டை திறந்து
யாரோ தந்த
ஒற்றை பார்சலை அவளிடம் வைத்தான்...
பிரிக்கும் போதே வெளிவந்தது
கெட்டுப் போன வாடை...
எந்தவித சலனமுமின்றி
அவன் எழுந்து நடந்தான்
அவள் படுத்துக்கொண்டாள்...
பாதி பிரிக்கப்பட்டு
காற்றில் பட படத்தது பார்சல்...

மையம்

மையம்மாற்றி
வரையப்பட்ட
வட்டத்தில்
தனித்திருக்கிறது
நேற்றைய மையம்....

பின்னிரவு

எல்லோரும் ஆழ்ந்து உறங்கிய பின்னிரவில்
கவிழ்ந்த தன் தட்டை
பலம்கொண்டமட்டும்
விலக்கிதள்ளியும்
பின் இழுத்து அணைத்தும்
சத்தமெழுப்பிக்கொண்டிருந்தது நாய்…
நான் உன் நினைவுகளை...

மழை

இதுவரை
உக்கிரமாய்
இருந்த கணங்களை
சொல்லிவிட்டுப்போனது
நேற்றிரவு
அடித்துப் பெய்த மழை...

இழப்பு

பெருமரத்தின்
முறிந்த கிளையொன்று
உறுத்தப்போவதில்லை
யாருடைய கண்களுக்கும்...
இழப்பறியும் மரம்...